У міністра працы і сацыяльнай абароны Наталлі Паўлючэнка спыталі, якая сітуацыя на рынку працы ў Беларусі. «У цэлым устойліва развіваецца, захоўваючы баланс паміж патрэбамі эканомікі і працоўным патэнцыялам краіны», — заявіла чыноўніца. Нагадаем, у цэлым па краіне колькасць вакансій набліжаецца да адзнакі 200 тысяч.
— Найбольшы попыт адзначаецца на рабочыя спецыяльнасці. Так, паводле звестак на канец сакавіка, у агульнарэспубліканскім банку вакансій зарэгістравана каля 190 тыс. працоўных месцаў, і 70% з іх прыпадае на рабочыя спецыяльнасці. Напрыклад, у вытворчым сектары асабліва запатрабаваныя электраманцёры, слесары, зваршчыкі, — заявіла Наталля Паўлючэнка ў інтэрв'ю 1prof.by.
Паводле яе, у сферы паслуг найбольшы попыт на прадаўцоў, кіроўцаў, работнікаў бытавога абслугоўвання. «То-бок сёння адзначаецца ўстойлівы попыт на так званыя масавыя прафесіі, якія запатрабаваныя ў розных галінах эканомікі», — удакладніла міністр.
— На фоне дэфіцыту кадраў па-ранейшаму назіраецца адток эканамічна актыўнага насельніцтва, асабліва з глыбінкі. Нашая краіна спрашчае ўмовы прыёму на працу замежнікаў. Як захаваць неабходны баланс: не страціць сваіх кваліфікаваных спецыялістаў і прыцягнуць менавіта тых працоўных мігрантаў, у якіх мае патрэбу эканоміка? — спыталі Наталлю Паўлючэнка.
— Як я ўжо сказала, попыт на працоўную сілу расце. Для кадравага забяспечання эканомікі краіны неабходна шукаць дадатковыя крыніцы. Гэта паслужыла прычынай унясення змяненняў у заканадаўства пра міграцыю, якія прадугледжваюць прыцягненне кадраў з-за мяжы. З 2023-га нашае міністэрства вызначае пералік прафесій, на якія прыцягваюцца замежнікі без уліку абмежаванняў па абароне нацыянальнага рынку працы. Мы пачыналі з пяці прафесій рабочых і пяці пасадаў службоўцаў. У далейшым з улікам росту кадравай запатрабаванасці гэты пералік пашыраўся, і ў 2025-м ён ужо ўключае 41 прафесію рабочага і 18 пасадаў службоўцаў.
Наталля Паўлючэнка ўдакладніла, што «адным з прынцыпаў знешняй працоўнай міграцыі з’яўляецца абарона нацыянальнага рынку працы».
— Так, з боку службы занятасці з мэтай вырашэння кадравага пытання ў апошнія тры гады актыўна развіваецца такі кірунак, як складанне дарожных карт з наймальнікамі. І з моманту старту праекта дапамогу ў падборы кадраў атрымалі 910 з іх. Толькі за 2024-ы ў партнёрстве з наймальнікамі працаўладкавалі больш за 118 тыс. чалавек. Такі падыход дазваляе адрасна вырашаць пытанні кадравага забяспечання.
Чытайце таксама
